ШУТИС-ийн багш нар Герман Улсын Маннхайм хот дахь ABB компанийн салбарт зочилж, ACS880 давтамж хувиргагчийн гүнзгийрүүлсэн сургалтад амжилттай хамрагдлаа.
ШУТИС, Геологи, уул уурхайн сургуулийн багш нар Бүгд Найрамдах Герман Улсын Маннхайм хот дахь ABB компанийн салбарт зочилж, ACS880 давтамж хувиргагчийн гүнзгийрүүлсэн сургалтад амжилттай хамрагдлаа. Монгол дахь ABB-ийн албан ёсны төлөөлөгч Монхороус ХХК болон Бодит Чадал ХХК-тай хамтран ШУТИС, Геологи, уул уурхайн сургуульд "Цахилгаан хөтлүүр автоматжуулалтын лаборатори"-ийг байгуулж, ашиглалтад оруулсан.
Энэхүү лаборатори нь ACS880 давтамж хувиргагч, AC500 төрлийн программчлагдах логик удирдлага (PLC), HMI хяналтын дэлгэц зэрэг ABB-ийн дэвшилтэт төхөөрөмжөөр бүрэн тоноглогдсон орчин үеийн лаборатори бөгөөд салбарын инженерүүд ABB-ийн технологид суурилсан үйлдвэрлэлийн орчны дадлага сургалтад хамрагдаж, онолын мэдлэгийг бодит туршлагатай уялдуулан эзэмшиж байна.
Түүнчлэн тус сургуулийн олон төгсөгч өнөөдөр Монголын уул уурхайн тэргүүлэх компаниудад ABB-ийн тоног төхөөрөмжийг өдөр тутмын үйл ажиллагаандаа амжилттай ашиглан ажиллаж байгаа нь бахархалтай үзүүлэлт юм. Энэхүү айлчлал нь мэргэжлийн туршлага, харилцан суралцах боломжийг бүрдүүлээд зогсохгүй, ABB-ийн технологи дэлхий дахинд хэрхэн бодит нөлөө үзүүлж байгааг болон боловсрол, үйлдвэрлэл хоёр гар нийлэн хөгжих боломжтойг харуулсан онцлох үйл явдал боллоо.
ГУУС, ЭБИС